Ek is gaande oor die natuur en is selfs verlief op die Skepper daarvan. Ek geniet en waardeer die lewe saam met Hom en al my familie en vriende wat dit saam met my deel...
Ons land het baie gebed nodig. Die laaste twintig jaar het baie veranderings plaasgevind maar tog is die transformasie van ons land nog glad nie klaar nie. Die regering, mediese- en skool stelsels het nog ‘n hele entjie om te gaan en dit is ons verantwoordelikheid om God se wil daaroor te bid. Groot werke van Sy genade en liefde is reeds sigbaar in ons midde, maar tog staar ons ons blind teen dit wat nog nie verander het nie…
…en wanneer my volk, oor wie my Naam uitgeroep is, hulle verootmoedig en bid en my aangesig soek en hulle bekeer van hul verkeerde weë, dan sal Ék uit die hemel hoor en hulle sonde vergewe en hulle land genees.
(2 Kronieke 7:14).
Kom ons bid God se wil oor ons land t.o.v die tugtigingswet, misdaad, die bankwese en ook ons ekonomiese stelsel.
Kom deel met ons jou hart van gebed vir ons land sodat ons saam met jou kan bid.
Hemel Vader, hier is soveel seer, soveel pyn in hierdie wêreld van ons. Ek bid en vra dat U koninkryk kom en U wil geskied hier op aarde soos dit is in die hemel. Ek droom oor ‘n wêreld sonder al die pyn en die seer… ‘n wêreld vry van haat en misdaad?
Onse Vader wat in die hemele is,
laat u Naam geheilig word;
laat u koninkryk kom;
laat u wil geskied,
soos in die hemel net so ook op die aarde;
gee ons vandag ons daaglikse brood;
en vergeef ons ons skulde,
soos ons ook ons skuldenaars vergewe;
en lei ons nie in versoeking nie,
maar verlos ons van die Bose.
Want aan U behoort die koninkryk,
die krag en die heerlikheid tot in ewigheid.
Amen.
(Mat.6:9-13 & Luk.11:2-4.)
Hemelse Vader,
ek bid vir ons land Suid Afrika,
seën ons, as ‘n nasie en volk.
Skenk geboorte in ons harte
aan vryheid en geregtigheid,
aan broederskap en liefde.
Bewaar ons teen oorlog,
teen vrees en ongeregtigheid,
teen moedeloosheid en nederlaag.
Seën ons president
en al die leiers van ons land
skenk aan hulle wysheid en moed,
visie en hoop in elke besluit t.o.v. ons Land.
Maak ons meer en meer bewus
van ons erfenis,
maak ons bewus van ons regte,
en ook ons verantwoordelikhede
as kinders van God
en as landsburgers.
Maak aan ons bekend u wil,
tot die vervulling van u woord
vir die restourasie en doel,
en die toekoms vir ons land
tot die verheerliking van Jesus Christus.
Seën Ons Land Suid Afrika.
Amen.
Here Hemel Vader
Groot is u naam oor die hele aarde
Ek loof en prys U.
Ek bid U seën en beskerming
oor ons land Suid-Afrika,
Ek bid U wil toe oor die verkiessing,
en die veranderings in die geledere van die ANC.
Laat U wil geskiet en U koninkryk kom.
In die naam van Jesus Christus, ons Here.
Amen.
Hoe wonderlik is dit om U te ken as ons Vader,
Heilig is u Naam oor die ganse aarde.
Deur ons gebed nooi ons U nader,
Want in u alleen het ons werklik waarde.
Dankie Hemel Vader vir ons Land Suid Afrika,
Ek bid u sëen, liefde en beskerming oor haar.
Skenk ons u lewe in oorvloed, O Heer!
Stuur ons u lig en u waarheid,
Laat diè ons lei en bring,
Na u heilige berg en na u wonings.
Hemel Vader, sëen ons land Suid Afrika,
Stort u Heilige Gees oor haar.
Wees u ons lewe, O Heer,
diè lewe – ons lig en waarheid!
Laat diè ons in u koninkryk bring,
as u heilige heersers en konings.
Laat u koninkryk kom,
Laat u wil geskied,
Soos in die Hemel,
So ook in Afrika!
Hoe wonderlik is u naam, O Vader,
Hoe groot is u naam in die ganse aarde!
Want aan u behoort alles wat lewe,
Ons Skepper, Koning en Here!
Gebed vir Vrede
Almagtige God en Vader,
vanuit wie alle waarheid en vrede kom,
raak die harte van alle mense aan
met u heilige liefde en vrede.
Kom, O Prins van vrede,
lei en leer die heersers van ons land,
met besluitneming deur u volkome wysheid.
Skenk aan hul u onderskeidingsvermoë,
tot die vooruitgang van u koninkryk,
totdat ons hele land gevul word
met die kennis van u oneindige liefde.
Dankie Jesus, ons Here en Verlosser.
Ek het hierdie e-pos vanoggend ontvang. Dit is ‘n gebed vir ons Land, ‘n noodkreet in ‘n land van duisternis, want ons glo in ‘n almagtige God wat in hierdie duisternis instap en Sy lig skyn. Sy teenwoordigheid bring nuwe lewe vir almal. Bid saam met ons:
Ek bid saam vir ons land. Nog beter ons moet vir die hele wêreld bid sodat almal kan sien wie Jesus is.